search icon
என் மலர்tooltip icon
      முகப்பு » பக்தர்கள் தரிசனம்

      நீங்கள் தேடியது "பக்தர்கள் தரிசனம்"

      category icon செய்திகள்
      பத்ரிநாத் கோவில் நடை திறப்பு- 10 ஆயிரம் பக்தர்கள் தரிசனம்
      சென்னை

      பத்ரிநாத் கோவில் நடை திறப்பு- 10 ஆயிரம் பக்தர்கள் தரிசனம்

      உத்தரகாண்ட் மாநிலத்தில் உள்ள பத்ரிநாத் கோவில் நடை 6 மாதத்திற்கு பிறகு இன்று அதிகாலை மீண்டும் திறக்கப்பட்டது. ஆயிரக்கணக்கான பக்தர்கள் தரிசனம் செய்தனர். #BadrinathTemple #CharDhamYatra
      டேராடூன்:

      உத்தரகாண்ட் மாநிலம் சமோலி மாவட்டத்தில் உள்ளது பத்ரிநாத் கோவில். இமயமலைத் தொடரில் கர்வால் மலையில் அமைந்துள்ள இந்த விஷ்ணு கோவில், கடல் மட்டத்தில் இருந்து 10 ஆயிரம் அடி உயரத்தில் உள்ளது. பக்தர்கள் சார்தாம் யாத்திரை மேற்கொள்ளும் 4 புனித தலங்களில் இக்கோவிலும் ஒன்று. 

      நாடு முழுவதிலும் இருந்து லட்சக்கணக்கான பக்தர்கள் யாத்திரையாக இக்கோவிலுக்கு வந்து தரிசனம் செய்கின்றனர். குளிர்காலங்களைத் தவிர மீதமுள்ள 6 மாதங்கள் மட்டும் கோவில் நடை திறக்கப்பட்டு பக்தர்களின் தரிசனத்திற்கு அனுமதி வழங்கப்படும். 

      அவ்வகையில் குளிர்காலம் முடிவடைந்துள்ள நிலையில், 6 மாதத்திற்குப் பிறகு இன்று அதிகாலை 4.15 மணியளவில் வேத மந்திரங்கள் முழங்க கோவில் நடை திறக்கப்பட்டது. மலர்களால் அலங்கரிக்கப்பட்ட கோவில் நடையை தலைமை பூசாரி ஈஸ்வரி பிரசாத் நம்பூதிரி திறந்தார். அப்போது கோவில் பூசாரிகள், நிர்வாகிகள் மற்றும் சுமார் 10 ஆயிரம் பக்தர்கள் சாமி தரிசனம் செய்தனர். ஆளுநர் பேபி ராணி மயூர்யா, முன்னாள் முதல்வர் ரமேஷ் பொக்ரியால் நிஷாங்க் போன்ற முக்கிய பிரமுகர்களும் இன்று சாமி தரிசனம் செய்தனர்.

      இமயமலையில் உள்ள கேதார்நாத் சிவன் கோவில், பத்ரிநாத் விஷ்ணு கோவில் மற்றும் கங்கோத்ரி, யமுனோத்ரி ஆகிய அம்மன் கோவில்களுக்கான சார்தாம் யாத்திரை அட்சய திருதியை தினத்தில் (மே 7) தொடங்கியது. அன்றைய தினம் கங்கோத்ரி மற்றும் யமுனோத்ரி கோவில் நடை திறக்கப்பட்டது. நேற்று கேதார்நாத் கோவில் நடை திறக்கப்பட்டு வழிபாடு தொடங்கிய நிலையில், இன்று பத்ரிநாத் விஷ்ணு கோவில் நடை திறக்கப்பட்டுள்ளது. 

      யாத்ரீகர்கள் முதலில் யமுனோத்ரியில் வழிபாடு நடத்தி விட்டு அதன்பின்னர் கங்கோத்ரி, கேதார்நாத் தலங்களில் தரிசனம் செய்துவிட்டு, இறுதியாக பத்ரிநாத் வந்து விஷ்ணுவை வழிபட்டு சார்தாம் யாத்திரையை நிறைவு செய்வார்கள். #BadrinathTemple #CharDhamYatra
      badrinath temple devotees பனிப்பொழிவு பத்ரிநாத் கோவில் பக்தர்கள் பக்தர்கள் தரிசனம் 
      category icon செய்திகள்
      6 மாதத்திற்கு பிறகு கேதார்நாத் கோவில் நடை திறப்பு- வேத மந்திரங்கள் முழங்க பக்தர்கள் தரிசனம்
      சென்னை

      6 மாதத்திற்கு பிறகு கேதார்நாத் கோவில் நடை திறப்பு- வேத மந்திரங்கள் முழங்க பக்தர்கள் தரிசனம்

      உத்தரகாண்டில் உள்ள கேதார்நாத் கோவில் நடை 6 மாதத்திற்கு பிறகு இன்று மீண்டும் திறக்கப்பட்டது. வேத மந்திரங்கள் முழங்க ஏராளமான பக்தர்கள் தரிசனம் செய்தனர். #KedarnathTemple #CharDhamYatra
      டேராடூன்:

      இமயமலைத் தொடரில் புகழ்பெற்ற கேதார்நாத் சிவன் கோவில் அமைந்துள்ளது. உத்தரகாண்ட் மாநிலம் ருத்ரபிரயாக் மாவட்டத்தில் உள்ள இந்த கோவில், கடல் மட்டத்தில் இருந்து 11,755 அடி உயரத்தில் உள்ளது. நாடு முழுவதிலும் இருந்து லட்சக்கணக்கான பக்தர்கள் யாத்திரையாக இக்கோவிலுக்கு வந்து தரிசனம் செய்கின்றனர். குளிர்காலங்களைத் தவிர மீதமுள்ள 6 மாதங்கள் மட்டும் கோவில் நடை திறக்கப்பட்டு பக்தர்களின் தரிசனத்திற்கு அனுமதி வழங்கப்படும்.

      அவ்வகையில் குளிர்காலம் முடிவடைந்துள்ள நிலையில், 6 மாதத்திற்குப் பிறகு இன்று கோவில் நடை திறக்கப்பட்டது. இதற்காக கோவில் வண்ணம் தீட்டப்பட்டு அலங்கரிக்கப்பட்டிருந்தது. மலர்களால் அலங்கரிக்கப்பட்ட நுழைவு வாயில், வேத மந்திரங்கள் முழங்க அதிகாலை 5.30 மணியளவில் திறக்கப்பட்டது. அப்போது கோவில் பூசாரிகள், நிர்வாகிகள் மற்றும் ஏராளமான பக்தர்கள் சாமி தரிசனம் செய்தனர்.

      இந்த ஆண்டு 10 லட்சத்திற்கும் மேற்பட்ட பக்தர்கள் கேதார்நாத் கோவிலுக்கு வருகை தருவார்கள் என எதிர்பார்க்கப்படுகிறது. கேதார்நாத் வரும் பக்தர்களின் வசதிக்காக மாநில அரசு விரிவான ஏற்பாடுகளை செய்துள்ளது. இரவு நேரங்களில் சுமார் 3000 பக்தர்கள் தங்கும் வகையில், கூடாரங்கள் அமைக்கப்படுகின்றன.

      கோடை காலம் தொடங்கியபோதிலும், கேதார்நாத் கோவில் வளாகத்தில் இன்னும் பனிசூழ்ந்து காணப்படுகிறது. பக்தர்கள் கோவிலுக்கு எளிதில் சென்று வரும் வகையில், பனிக்கட்டிகளை அகற்றி பாதை அமைக்கப்பட்டுள்ளது.

      இமயமலையில் உள்ள கேதார்நாத் சிவன் கோவில், பத்ரிநாத் விஷ்ணு கோவில் மற்றும் கங்கோத்ரி, யமுனோத்ரி ஆகிய அம்மன் கோவில்களுக்கான, சார்தாம் யாத்திரை நேற்று முன்தினம் அட்சய திருதியை தினத்தில் தொடங்கியது. முதல் நாளில் கங்கோத்ரி கோவில் நடை காலை 11.30 மணிக்கு திறக்கப்பட்டது. மதியம் 1.15 மணிக்கு யமுனோத்ரி கோவில் நடை திறக்கப்பட்டு ஆயிரக்கணக்கான பக்தர்கள் தரிசனம் செய்தனர். இன்று கேதார்நாத் கோவில் நடை திறக்கப்பட்டு வழிபாடு தொடங்கியிருக்கிறது. பத்ரிநாத் விஷ்ணு கோவில் நடை நாளை (9-ம் தேதி) திறக்கப்படுகிறது.



      ஒவ்வொரு ஆண்டும் இந்த சார்தாம் யாத்திரை காலங்களில் இந்தியா மட்டுமின்றி வெளிநாடுகளில் இருந்தும் ஏராளமான பக்தர்கள் இந்த 4 புனித தலங்களுக்கும் வந்து வழிபடுகின்றனர். யாத்ரீகர்கள் முதலில் யமுனோத்ரியில் வழிபாடு நடத்தி விட்டு அதன்பின்னர் கங்கோத்ரி, கேதார்நாத் தலங்களில் தரிசனம் செய்துவிட்டு, இறுதியாக பத்ரிநாத் வந்து விஷ்ணுவை வழிபட்டு யாத்திரையை நிறைவு செய்வார்கள். #KedarnathTemple #CharDhamYatra




      CharDham Yatra Uttarakhand Kedarnath temple pilgrims கேதார்நாத் கோவில் நடை திறப்பு வேத மந்திரங்கள் பக்தர்கள் தரிசனம் சார்தாம் யாத்திரை 
      category icon செய்திகள்
      சபரிமலையில் காட்சியளித்த மகரஜோதி - பல்லாயிரக்கணக்கான பக்தர்கள் தரிசித்தனர்
      சென்னை

      சபரிமலையில் காட்சியளித்த மகரஜோதி - பல்லாயிரக்கணக்கான பக்தர்கள் தரிசித்தனர்

      சபரிமலையில் இன்று மாலை மகரஜோதி வடிவில் காட்சியளித்த ஐய்யப்பனை பல்லாயிரக்கணக்கான பக்தர்கள் சரண முழக்கங்களுடன் தரிசித்து பரவசமடைந்தனர். #LakhsofPilgrims #MakaraJyothi #SabarimalaMakaraJyothi
      திருவனந்தபுரம்:

      கேரள மாநிலம், பத்தினம்திட்டா மாவட்டத்தில் உள்ள சபரிமலை அய்யப்பன் கோவிலில் மகரவிளக்கு பூஜைக்காக கடந்த மாதம் 30-ந்தேதி கோவில் நடை திறக்கப்பட்டது. நாள்தோறும் அய்யப்பனுக்கு நெய் அபிஷேகம் மற்றும் சிறப்பு வழிபாடுகள் நடைபெற்றன.

      விழாவின் முத்தாய்ப்பு நிகழ்ச்சியான மகரவிளக்கு பூஜை மற்றும் மகரஜோதி தரிசனம் இன்று (திங்கட்கிழமை) மாலை நடந்தது. 

      மகரவிளக்கு பூஜையையொட்டி சாமி ஐய்யப்பனுக்கு அணிவிக்கப்படும் திருவாபரணங்கள் மாலை 6.20 மணிக்கு சன்னிதானத்திற்கு வந்து சேர்ந்தது. அவற்றை தந்திரி ராஜீவரு மற்றும் மேல்சாந்தி வாசுதேவன் நம்பூதிரி ஆகியோர் பெற்று கொண்டனர்.

      அந்த திருவாபரணங்களை சாமிக்கு அணிவித்து சிறப்பு தீபாராதனை நடத்தினர். இதைதொடர்ந்து, இன்று மாலை 6.35 மணி அளவில் பொன்னம்பல மேட்டில் சாமி ஐய்யப்பன் ஜோதி வடிவில் 3 முறை காட்சி கொடுக்கும் மகரஜோதி தரிசன வைபவம் நடைபெற்றது.

      இந்த மகரஜோதியை பல்லாயிரக்கணக்கான பக்தர்கள் ‘சாமியே சரணம் ஐயப்பா’ என்ற சரண கோஷத்துடன் தரிசித்து பரவசம் அடைந்தனர். #LakhsofPilgrims #MakaraJyothi #SabarimalaMakaraJyothi
      sabarimala makara jyothi pilgrims சபரிமலை ஐயப்பன் கோவில் பக்தர்கள் தரிசனம் 
      category icon செய்திகள்
      சபரிமலையில் 18-ம் படி ஏற காத்திருக்கும் பக்தர்கள் கூட்டம்.
      சென்னை

      சபரிமலையில் ஒரே நாளில் 67 ஆயிரம் பக்தர்கள் தரிசனம்

      தமிழ்நாட்டில் இருந்து சபரிமலைக்கு செல்லும் பக்தர்கள் எண்ணிக்கை அதிகரித்துள்ளது. நேற்று ஒரே நாளில் 67 ஆயிரத்து 44 பக்தர்கள் ஐயப்பனை தரிசனம் செய்தனர். #Sabarimala
      திருவனந்தபுரம்:

      சபரிமலை ஐயப்பன் கோவில் நடை மண்டல பூஜைக்காக கடந்த மாதம் 16-ந்தேதி திறக்கப்பட்டது.

      சபரிமலையில் அனைத்து வயது பெண்களையும் அனுமதிக்க எதிர்ப்பு தெரிவித்து போராட்டங்கள் நடந்ததால் கோவில் நடை திறந்தபோது பக்தர்கள் வருகை குறைவாக இருந்தது. வெளியூர் மற்றும் வெளிமாநில பக்தர்களும் சபரிமலை செல்ல தயங்கினர்.

      இந்த நிலையில் சபரிமலையில் நடந்த போராட்டங்கள் விலக்கிக்கொள்ளப்பட்டது. போலீசாரின் கெடுபிடிகளும் குறைந்தன. மேலும் சபரிமலையில் பக்தர்களுக்கு செய்யப்பட்டுள்ள வசதிகளை ஐகோர்ட்டு நியமித்த குழு ஆய்வு செய்து திருப்தி தெரிவித்தது.

      இதையடுத்து சபரிமலைக்கு பக்தர்கள் வருகை அதிகரித்தது. குறிப்பாக தமிழ்நாட்டில் இருந்து தினமும் ஏராளமான பக்தர்கள் சபரிமலையில் குவிய தொடங்கினர். நடைதிறந்து 2 வாரங்களுக்கு பிறகு பக்தர்கள் எண்ணிக்கை உயரத் தொடங்கியது.

      நேற்று ஒரே நாளில் 67 ஆயிரத்து 44 பக்தர்கள் ஐயப்பனை தரிசனம் செய்தனர். மண்டல பூஜைக்காக நடை திறந்த பின்பு நேற்றுதான் மிக அதிகளவில் பக்தர்கள் வந்துள்ளனர். இதனை தேவஸ்தான அதிகாரிகள் தெரிவித்தனர். மேலும் சன்னிதானத்தில் 18-ம் படி ஏற 3 மணி நேரம் காத்திருக்கும் நிலையும் ஏற்பட்டது. #Sabarimala



      Sabarimala devotees worship சபரிமலை ஐயப்பன் கோவில் பக்தர்கள் தரிசனம் 
      category icon செய்திகள்
      திருப்பதி கோவிலில் விஐபிக்களுக்கு மாதம் ஒரு முறையே தரிசனம்- தேவஸ்தானம் ஆலோசனை
      சென்னை

      திருப்பதி கோவிலில் விஐபிக்களுக்கு மாதம் ஒரு முறையே தரிசனம்- தேவஸ்தானம் ஆலோசனை

      திருப்பதி கோவிலில் வி.ஐ.பி.க்களுக்கு மாதத்திற்கு ஒரு முறை மட்டுமே தரிசனம் வழங்குவது பற்றி தேவஸ்தானம் ஆலோசித்து வருகிறது. #Tirupati #TirupatiTemple
      திருப்பதி:

      திருப்பதி ஏழுமலையான் கோவிலில் வி.ஐ.பி.க்களுக்கு நாள்தோறும் அதிகாலை முதல் காலை 10 மணி வரை 3 பிரிவுகளில் தரிசனம் வழங்கப்பட்டு வருகிறது.

      இந்த தரிசனம் வி.ஐ.பி.க்கள், நிறுவனங்களின் தலைவர்கள், முக்கிய பிரமுகர்கள் உள்ளிட்டோருக்கு வழங்கப்படுகிறது.

      இவற்றை கவனிப்பதற்கு தனித்தனியாக மக்கள் தொடர்பு அதிகாரிகள் உள்ளனர். அவர்கள் வி.ஐ.பி.க்கள் வரும்போது அவர்களுக்குத் தேவையான தரிசன வசதிகளை ஏற்படுத்தித் தருகின்றனர்.

      இதுதவிர, வி.ஐ.பி.க்கள் தினசரி பிரேக் தரிசனத்திற்காக பலருக்கும் பரிந்துரை கடிதங்களை வழங்குகின்றனர். அவ்வாறு அவர்கள் வழங்கும் கடிதங்களை முதலில் சமர்ப்பிக்கப்படும் கடிதங்களுக்கு மட்டுமே தேவஸ்தானம் முன்னுரிமை வழங்கி வருகிறது.

      இந்நிலையில், பரிந்துரைக் கடிதங்கள் வழங்கப்படுவது தற்போது அதிகரித்துள்ளதால் சாமானிய பக்தர்களுக்கு காலையில் 10 மணிக்கு மேல்தான் தரிசனம் வழங்கப்படுகிறது.

      இதனால் காத்திருப்பு அறையில் இருக்கும் பக்தர்கள் அவதிக்குள்ளாகின்றனர். அவர்களுக்கு விரைவாக தரிசனம் வழங்குவதற்கு தேவஸ்தானம் நடவடிக்கைகளை மேற்கொண்டு வருகிறது.

      அதன் ஒரு பகுதியாக வி.ஐ.பி.க்களுக்கு மாதத்திற்கு ஒரு முறை மட்டுமே தரிசனம் வழங்குவது பற்றி தேவஸ்தானம் ஆலோசித்து வருகிறது. இதன்மூலம் வி.ஐ.பி.க்களின் எண்ணிக்கை குறைவதோடு, சாமானிய பக்தர்களுக்கு விரைவாக தரிசனம் அளிக்க முடியும் என்று தேவஸ்தானம் கருதுகிறது.

      எனினும், இந்த யோசனையை தேவஸ்தான அறங்காவலர் குழு உறுப்பினர்கள், உயர் அதிகாரிகள் ஆகியோர் ஒப்புக்கொள்வார்களா? என்பது கேள்விக்குறியாக உள்ளது. #Tirupati  #TirupatiTemple
      Tirupati temple VIPs Devotees darshan Devasthanam திருப்பதி கோவில் விஐபிக்கள் பக்தர்கள் தரிசனம் தேவஸ்தானம் 
      category icon செய்திகள்
      திருப்பதியில் சாமி தரிசனத்திற்காக வரிசையில் காத்திருந்த பக்தர்கள் கூட்டம்.
      சென்னை

      திருப்பதியில் 20 மணி நேரம் காத்திருந்து பக்தர்கள் தரிசனம்

      சரஸ்வதி பூஜை, விஜயதசமி மற்றும் சனி, ஞாயிற்றுக்கிழமை வார விடுமுறையையொட்டி திருப்பதியில் பக்தர்கள் கூட்டம் அதிகரித்துள்ளதால் சாமி தரிசனம் செய்ய 20 மணி நேரமாகிறது. #Tirupatitemple
      திருமலை:

      சரஸ்வதி பூஜை, விஜயதசமி மற்றும் சனி, ஞாயிற்றுக்கிழமை வார விடுமுறையையொட்டி திருப்பதியில் பக்தர்கள் கூட்டம் அலைமோதுகிறது.

      நேற்று காலையில் இருந்து மாலை வரை 98,230 பக்தர்கள் சாமி தரிசனம் செய்தனர். ரூ.1 கோடியே 66 லட்சம் உண்டியல் காணிக்கை வசூலாகியுள்ளது. 52 ஆயிரம் பேர் முடி காணிக்கை செலுத்தினர்.

      இன்று காலையிலும் திருப்பதியில் பக்தர்கள் கூட்டம் அதிகளவில் இருந்தது.

      வைகுண்டம் கியூ காம்ப்ளக்சில் உள்ள 31 கம்பார்ட்மெண்டுகளில் பக்தர்கள் நிரம்பி, நாராயணகிரி பூங்கா வரை 3 கிலோ மீட்டர் தூரத்துக்கு தரிசன வரிசையில் காத்திருந்தனர். அவர்கள் சாமி தரிசனம் செய்ய 20 மணி நேரமாகிறது.

      தரிசன வரிசையில் சென்ற பக்தர்களுக்கு ஸ்ரீவாரிசேவா சங்க தொண்டர்கள் உணவு, குடிநீர் ஆகியவற்றை வழங்கினர். திருமலையில் உள்ள பல இடங்களிலும் உணவுப் பொட்டலங்களை ஸ்ரீவாரிசேவா சங்க தொண்டர்கள் வழங்கி வருகிறார்கள்.  #Tirupatitemple
       


      Tirupati temple devotees worship திருப்பதி பக்தர்கள் தரிசனம் 
      category icon செய்திகள்
      திருப்பதியில் கோடை விடுமுறையில் 24½ லட்சம் பக்தர்கள் தரிசனம்
      சென்னை

      திருப்பதியில் கோடை விடுமுறையில் 24½ லட்சம் பக்தர்கள் தரிசனம்

      திருப்பதியில் கோடை விடுமுறையில் 24 லட்சத்து 55 ஆயிரம் பக்தர்கள் சாமி தரிசனம் செய்துள்ளனர். இந்த ஆண்டு மே மாதம் உண்டியல் காணிக்கையாக ரூ.86 கோடியே 46 லட்சம் கிடைத்துள்ளது.
      திருமலை:

      திருப்பதியில் உள்ள அன்னமய பவனில் பக்தர்களிடம் இருந்து தொலைபேசி மூலமாக குறைகள் கேட்கும் முகாம் நடந்தது. அதில் திருமலை-திருப்பதி தேவஸ்தான முதன்மைச் செயல் அலுவலர் அனில்குமார் சிங்கால் கலந்து கொண்டு பேசினார்.

      இலவச தரிசனத்தில் செல்லும் பக்தர்களுக்கு டைம் ஸ்லாட் முறையில் சனி, ஞாயிற்றுக்கிழமை ஆகிய 2 நாட்கள் தலா 30 ஆயிரம் டிக்கெட் வழங்கப்படுகிறது. திங்கள், வெள்ளிக்கிழமையில் தலா 20 ஆயிரம் டிக்கெட் வழங்கப்படுகிறது. செவ்வாய், புதன், வியாழக்கிழமையில் தலா 17 ஆயிரம் டிக்கெட் வழங்கப்படுகிறது.

      திருமலையில் கோடை விடுமுறையையொட்டி பக்தர்கள் கூட்டம் அதிகமாக இருப்பதால் கூடுதலாக உணவு கவுண்ட்டர்கள் திறக்கப்பட்டு உள்ளன. அவற்றில் தினமும் தலா 10 ஆயிரம் பேருக்கு மேல் உணவு வழங்கப்படுகிறது. ஆக மொத்தம் ஒருநாளைக்கு திருமலையில் 2 லட்சத்து 30 ஆயிரம் பக்தர்களுக்கு உணவு வழங்கப்படுகிறது.

      வைகுண்டம் கியூ காம்ப்ளக்சில் 70 ஆயிரம் பக்தர்களுக்கும், அன்னதானக்கூடத்தில் 60 ஆயிரத்தில் இருந்து 70 ஆயிரம் பக்தர்களுக்கும் உணவு வழங்கப்படுகிறது. சனி, ஞாயிற்றுக்கிழமையில் ஒருநாளைக்கு அன்னதானக்கூடத்தில் 1 லட்சம் பேருக்கு உணவு வழங்கப்படுகிறது. அமைனிட்டி காம்ப்ளக்ஸ் 2-ல் தினமும் 10 ஆயிரம் பேருக்கு உணவு வழங்கப்படுகிறது.

      கடந்த ஆண்டு மே மாதம் 26 லட்சத்து 54 ஆயிரம் பக்தர்கள் சாமி தரிசனம் செய்தனர். இந்த ஆண்டு மே மாதம் 24 லட்சத்து 55 ஆயிரம் பக்தர்கள் சாமி தரிசனம் செய்துள்ளனர். கடந்த ஆண்டு மே மாதம் 1 கோடியே 7 லட்சம் லட்டுகள் பக்தர்களுக்கு வினியோகம் செய்யப்பட்டுள்ளது. இந்த ஆண்டு மே மாதம் 1 கோடியே 5 லட்சம் லட்டுகள் வினியோகம் செய்யப்பட்டுள்ளது.

      கடந்த ஆண்டு மே மாதம் 70 லட்சம் பக்தர்கள் உணவு சாப்பிட்டுள்ளனர். இந்த ஆண்டு மே மாதம் 70 லட்சத்து 83 ஆயிரம் பக்தர்கள் உணவு சாப்பிட்டுள்ளனர். கடந்த ஆண்டு மே மாதம் உண்டியல் காணிக்கையாக ரூ.78 கோடியே 47 லட்சம் கிடைத்துள்ளது. இந்த ஆண்டு மே மாதம் உண்டியல் காணிக்கையாக ரூ.86 கோடியே 46 லட்சம் கிடைத்துள்ளது.

      இந்த ஆண்டு மே மாதம் திவ்ய தரிசனத்தில் 5 லட்சத்து 36 ஆயிரம் பக்தர்கள் தரிசனம் செய்துள்ளனர். இலவச தரிசனத்தில் டைம் ஸ்லாட் முறையில் இந்த ஆண்டு மே மாதம் 5 லட்சத்து 56 ஆயிரம் பேருக்கு தரிசன அனுமதி அட்டை வழங்கப்பட்டுள்ளது. 300 ரூபாய் கட்டண பிரத்யேக பிரவேச தரிசனத்தில் 5 லட்சத்து 14 ஆயிரம் பேர் தரிசனம் செய்துள்ளனர். இந்த ஆண்டு மே மாதம் டைம் ஸ்லாட் அல்லாமல் வைகுண்டம் கியூ காம்ப்ளக்ஸ் வழியாக சென்று 5 லட்சத்து 15 ஆயிரம் பேர் தரிசனம் செய்துள்ளனர். முதியோர், மாற்றுத்திறனாளிகள், ஒரு வருட கைக்குழந்தைகளுடன் வந்த பெண் பக்தர்கள் என மொத்தம் 55 ஆயிரம் பேர் தரிசனம் செய்துள்ளனர்.

      இவ்வாறு அவர் பேசினார்.

      summer vacation 24 lakh devotees darshan Tirupati திருப்பதி கோடை விடுமுறை பக்தர்கள் தரிசனம் 
      category icon செய்திகள்
      திருவாரூரில் ஆழித்தேரோட்டம்: பல்லாயிரக்கணக்கான பக்தர்கள் வடம் பிடித்து தேரை இழுத்தனர்
      திருவாரூர்

      திருவாரூரில் ஆழித்தேரோட்டம்: பல்லாயிரக்கணக்கான பக்தர்கள் வடம் பிடித்து தேரை இழுத்தனர்

      திருவாரூர் தியாகராஜர் கோயில் தேரோட்டம் இன்று காலை வெகு விமரிசையாக நடைபெற்றது. இதில் பல்லாயிரக்கணக்கான பக்தர்கள் கலந்து கொண்டனர்.

      திருவாரூர்:

      “ஆழித்தேர் வித்தகனை நான் கண்டது ஆரூரே” என திருநாவுக்கரசரும், “தேராரூம் நெடுவீதி திருவாரூர்” என சேக்கிழாரும் பாடிய சிறப்பு மிக்கது திருவாரூர் ஆழித்தேராகும். திருவாரூரில் வீற்றிருக்கும் தியாகராஜர் ஆலயம் சைவ சமய மரபில் பெரிய கோயில் என்று அழைக்கப்படுகிறது.

      இக்கோயில் சைவ சமயத்திற்கே பெரிய பீடமாய் விளங்குவது மட்டுமல்லாமல் பிறந்தாலும், பெயர் சொன்னாலும் முக்தி அளிப்பது ஆகும். பஞ்ச பூத தலங்களுல் பூமிக்குரிய தலமாக விளங்கும் இக்கோயில் சனீஸ்வரனும், நளனும் வணங்கி சாபம் போக்கியதன் மூலம் சர்வதோ‌ஷ பரிகார தலமாகவும் விளங்குகிறது.

      இக்கோயில் ஆழித்தேர் ஆசியாவிலேயே பெரிய தேராக விளங்குகிறது. திருவாரூர் தேரோட்ட திருவிழாவினை திருநாவுக்கரசரும் திருஞான சம்பந்தரும் வந்து தங்கி தேரோட்ட ஏற்பாடுகளை பார்ப்பதாகவும் இத்தேரினை இந்திரன் முதலான தேவர்கள் வான்நின்று வணங்கி மகிழ்வதாக ஐதீகம்.

      இத்தகைய சிறப்பு மிக்க திருவாரூர் தியாகராஜர் கோயில் தேரோட்டம் இன்று காலை வெகு விமரிசையாக நடைபெற்றது. காலை 6 மணிக்கு தியாகராஜருக்கும் தேருக்கும் சிறப்பு பூஜைகள் நடத்தப்பட்டு தேரோட்டம் தொடங்கியது. வேத மந்திரங்கள் முழங்க தேரோட்டத்தினை அமைச்சர் ஆர்.காமராஜ் கொடி அசைத்து தொடங்கி வைத்தார். கொடி அசைக்கப் பட்டவுடன் பக்தர்கள் ஆருரா! தியாகேசா!! என உற்சாக குரல் எழுப்பி வடம்பிடித்து தேரினை இழுத்தனர்.

      தேரோட்டத்தினை முன்னிட்டு கோயிலின் தேவாசிரிய மண்டபத்தில் இருந்து தியாகராஜர் கடந்த 20-ந்தேதி புறப்பட்டு அஜபா நடனத்துடன் நகர்வலமாக வந்து திருத்தேர் ஏறினார். அதுமுதல் தேரிலிருந்தே பக்தர்களுக்கு தியாகராஜர் காட்சி அளித்தார். முன்னதாக 5 மணிக்கு விநாயகர், முருகன் தேர்கள் பக்தர்களால் இழுத்து செல்லப்பட்டது. தியாகராஜர் ஆழித்தேரை தொடர்ந்து அம்பாள் மற்றும் சண்டிகேசுவரர் தேர்களும் பக்தர்களால் இழுக்கப்பட்டது. 5 தேர்கள் ஒன்றன்பின் ஒன்றாக சென்ற காட்சி பக்தர்களை பரவசப்படுத்தும் விதமாக இருந்தது.

      அழகிய வண்ண துணிகளால் அலங்கரிக்கப்பட்ட தேர் பார்ப்பவர்களின் மனங்களை கொள்ளை கொள்ளும் வகையில் இருந்தது. 96 அடி உயரத்தில் கம்பீரமாய் அசைந்தாடி வந்த தேரினை காண தமிழகத்தின் பல்வேறு பகுதிகளில் இருந்து பல்லாயிரக்கணக்கான பக்தர்கள் வந்திருந்தனர். தேரோட்ட நிகழ்ச்சியில் ஆதீன கர்த்தர்கள் தருமபுரம் ஆதீனம், திருப்புகழூர் வேளாக்குறிச்சி ஆதீனம், திருவாடுவடுதுறை மற்றும் திருப்பனந்தாள் ஆதீனங்கள் பங்கேற்றனர். இந்த நிகழ்வில் உயர்நீதிமன்ற நீதிபதி பாஸ்கரன், கலெக்டர் நிர்மல்ராஜ், மாவட்டக் காவல்துறை கண்காணிப்பாளர் மயில் வாகணன், அற நிலையத்துறை அதிகாரிகள் இணை ஆணையர் தென்னரசு, உதவி ஆணையர் கிருஷ்ணன், தக்கார் பாலசுப்ரமணியன், அ.தி.மு.க. மாவட்டப் பொருளாளர் ஏ.என்.ஆர்.பன்னீர்செல்வம், நகர செயலாளர் ஆர்.டி.மூர்த்தி, கூட்டுறவு சங்க தலைவர் கலியபெருமாள். சின்னராஜ், தொழில திபர்கள் எஸ்.வி.டி.ராஜ், வி.ஆர்.என். பன்னீர் செல்வம், பிரபாகரன், கல்வி அறங்காவலர்கள் காலைக்கதிரவன், சந்திரா முருகப்பன், ராஜேந்திரன், பேரளம் செல்வம் உள்ளிட்ட பலர் கலந்து கொண்டனர்.

      தேரோட்டம் காண பல்லாயிரக்கணக்கில் மக்கள் கூட்டம் குவிந்ததால் நகர் முழுவதும் பலத்த போலீஸ் பாதுகாப்பு போடப்பட்டுள்ளது. பொதுமக்கள் அதிகம் கூட உள்ளதால் நகராட்சி சார்பில் குடிநீர் வசதி, சுகாதார வசதிகள் ஏற்படுத்தப்பட்டுள்ளது.

      திருவாரூர் தியாராஜர் தேரானது மூன்றாவது முறையாக உருவாக்கப்பட்டது. இத்தேர் பீடம் உயர்ரக மரங்களால் 36 அடி உயரத்தில் அமைக்கப்பட்டு உள்ளது. இதன் மீது மூங்கில் மற்றும் பனஞ்சப்பைகளால் 60 அடி உயரத்திற்கு கோபுரம் எழுப்பப்பட்டு 96 அடி உயர தேராக காட்சி அளிக்கிறது. தேர் கோபுரத்தினை சுற்றி சுமார் 5 டன் எடையுள்ள வண்ணத்துணிகள் கொண்டு அலங்கரிக்கப்பட்டுள்ளது. அலங்கரிக்கப்பட்ட தேரின் மொத்த எடை 450 டன் என கூறப்படுகிறது. 450 டன் எடையுள்ள 96 அடி உயர தேரினை இழுக்க 15 டன் எடை கொண்ட வடக்கயிறு கட்டப்பட்டுள்ளது. ஒவ்வொரு வடக்கயிறின் நீளம் சுமார் 1 கிமீ தூரமாகும்

      திருவாரூர் தியாகராஜர் கோயில் வேலி நிலப்பரப்பிலும் கோயில் கமலாலய குளம் 5 வேலி பரப்பிலும், கோயில் பூஜைக்குரிய செங்கழுநீர் பூ வளர்க்கப்படும் செங்கழுநீர் ஓடை 5 வேலி பரப்பிலும் அமைக்கப்பட்டது. இதில் செங்கழுநீர் ஓடை மட்டும் ஆக்கிரமிப்புகள் ஏற்பட்டு பரப்பளவில் மிகவும் சிறியதாகிவிட்டது. 5 வேலி பரப்பில் பரந்துவிரிந்துள்ள கோயில் வளாகத்தில் தேர் மற்றும் விசே‌ஷ நாட்களில் ஏராளமான கடைகள் அமைக்கப்படும். 

      தமிழகத்தின் பல்வேறு பகுதிகளில் இருந்து வியாபாரிகள் வந்திருந்து கடைகள் அமைப்பர். பல அரிய பொருட்கள் இந்த கடைகளில் விற்கப்படுவதால் தேரோட்டம் காணவரும் பக்தர்கள் தவிர்க்காமல் இந்த கடைகளுக்கும் வந்து பொருள்களை வாங்கி செல்வர், மதுரை கோயில் தீ விபத்தை தொடர்ந்து கோயில் வளாகத்தில் கடைகள் அமைக்க தடை ஏற்படுத்தப்பட்டதால் இந்த ஆண்டு இக்கோயிலில் கடைகள் அமைக்கப்படவில்லை. இதனால் கோயிலுக்கு வந்த பக்தர்கள் பொருட்கள் வாங்க முடியாமல் ஏமாற்றத்துடன் திரும்பி சென்றனர்.

      திருவாரூர் தியாகராஜர் கோயில் சைவ சமயத்திற்கே பெரிய கோயிலாக விளங்குவதாலும் சைவ சமய மரபில் பெரிய கோயில் எனப்படுவதாலும் இக்கோயில் தேரோட்டத்தினை காண தமிழகம் முழுவதும் இருந்து சிவனடியார்கள் வருவது வழக்கம். இந்தவகையில் இந்த ஆண்டு தேரோட்டத்திற்கும் ஏராளான சிவனடியார்கள் வந்திருந்தனர். அவர்கள் தியாகராஜரை தரிசித்துவிட்டு தேருக்கு முன்பகுதியில் உடுக்கு மற்றும் மேளம் இசைத்து ஆடிப்பாடி சென்றனர்.

      thiruvarur chariot devotees worship திருவாரூரில் ஆழித்தேரோட்டம் பக்தர்கள் தரிசனம் திருவாரூர் தியாகராஜர் கோயில் 
      ×
        X
        sidekick